ທ່ານ ປອ ສົມເພັດ ຣັຕນະສິມ ປະທານສະພາບໍລິຫານສະຖາບັນ ຣັຕນະບໍລິຫານ ທຸລະກິດ ໄດ້ນຳເອົາເງິນ ຈຳນວນ 20 ລ້ານກີບ ໄປມອບໃຫ້ກະຊວງສຶກສາທິການ ແລະ ກິລາ ເພື່ອນໍາໄປມອບຕໍ່ຊ່ວຍເຫຼືອຂະແໜງການສຶກສາ, ວິທະຍາສາດ ແລະ ກິລາ ກໍຄື ພະນັກງານຄູອາຈານ ແລະ ນັກຮຽນ ທີ່ປະສົບເຄາະຮ້າຍຈາກໄພພິບັດນໍ້າຖ້ວມໃນຂອບເຂດທົ່ວປະເທດ.

ພິທີມອບ-ຮັບເງິນຊ່ວຍເຫຼືອດັ່ງກ່າວ, ໄດ້ຈັດຂຶ້ນໃນຕອນເຊົ້າວັນທີ 26 ກັນຍາ 2024 ທີ່ຫ້ອງຮັບແຂກ ສຳນັກກະຊວງ ສສກ ໂດຍກ່າວມອບຂອງທ່ານ ປອ ສົມເພັດ ຣັຕນະສິມ ປະທານສະພາບໍລິຫານສະຖາບັນຣັຕນະບໍລິຫານທຸລະກິດ ແລະ ເປັນກຽດຮັບໂດຍ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ (ສສກ), ມີທ່ານ ສຸພາບ ຄູນວິໄຊ ຮອງຫົວໜ້າຫ້ອງການກະຊວງ ສສກ ແລະ ທ່ານ ບຸນເທືອງ ມູນລາສີ ຜູ້ອຳນວຍການສະຖາບັນ ຣັຕນະ ບໍລິຫານທຸລະກິດ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ທ່ານ ລັດຖະມົນຕີ ໄດ້ສະແດງຄວາມຂອບໃຈຕໍ່ການປະກອບສ່ວນຂອງທຸກພາກສ່ວນ ເພື່ອຊ່ວຍເຫຼືອຂະແໜງການສຶກສາ, ວິທະຍາສາດ ແລະ ກິລາ ຊຶ່ງປີນີ້ເຫັນວ່າ ສະພາບນໍ້າຖ້ວມເປັນບໍລິເວນກວ້າງ ການຊ່ວຍເຫຼືອດັ່ງກ່າວຈະຊ່ວຍແບ່ງເບົາຜົນກະທົບໃນຂະແໜງການ ແລະ ຊຸກຍູ້ໃຫ້ສະຖານການສຶກສາບ່ອນທີ່ໄດ້ຮັບຜົນກະທົບ ໄດ້ກັບມາເປີດຮຽນຄືນໂດຍໄວ.

ພາບ-ຂ່າວໂດຍ ສົງການ ພັນແພງ